యలహంక నాదే.. నా గొడవతో పెళ్లి వేదిక మారుస్తున్నా!

అన్న జగన్‌కు షర్మిల ఘాటు కౌంటర్‌.. కుమార్తె పెళ్లి వేదిక మార్పుపై కీలక ప్రకటన

బెంగళూరులోని యలహంక ప్యాలెస్‌ వ్యవహారం వైఎస్‌ కుటుంబంలో మరోసారి తీవ్ర చర్చకు దారితీసింది. ఈ వివాదంపై ఏపీ కాంగ్రెస్‌ అధ్యక్షురాలు వైఎస్‌ షర్మిల తొలిసారిగా బహిరంగంగా స్పందించారు. తన అన్న, మాజీ ముఖ్యమంత్రి వైఎస్‌ జగన్‌ మోహన్‌రెడ్డికి పరోక్షంగా ఘాటైన సమాధానమిస్తూ సోషల్‌ మీడియాలో సుదీర్ఘ పోస్టు పెట్టారు. “నాది కాని దానికోసం ఆశపడే నీచత్వం నాది కాదు.. యలహంక ప్రాపర్టీ నాదే” అంటూ తన వాదనను స్పష్టం చేశారు.

యలహంక ఆస్తికి సంబంధించిన వాస్తవాలను దేవుడి సాక్షిగా చెబుతున్నానని పేర్కొన్న షర్మిల.. జగన్‌ ముఖ్యమంత్రి కాకముందు వరకు ఆస్తి ఉమ్మడి ఆస్తిగా ఉండేదని వెల్లడించారు. అయితే కుటుంబ ఆస్తుల పంపకాల సమయంలో యలహంక ప్రాపర్టీ పూర్తిగా తనకు, తన పిల్లల వాటాకు వచ్చిందని స్పష్టం చేశారు. ఈ ఆస్తిపై తన పిల్లలకు హక్కు ఉందని, దివంగత వైఎస్‌ రాజశేఖర్‌రెడ్డి స్వయంగా తిరిగిన ఇల్లు కావడంతో తమ కుటుంబానికి ఆ ఇంటితో ప్రత్యేక అనుబంధం ఉందని వివరించారు.

తన కుమార్తె వైఎస్‌ అంజలి రెడ్డి కోరిక మేరకు ఆమె పెళ్లిని యలహంకలోని తమ సొంత ఇంట్లోనే జరిపించాలని భావించినట్లు షర్మిల తెలిపారు. ప్రతి తల్లిదండ్రికి తమ సొంత ఇంట్లో బిడ్డ వివాహం జరిపించడం ఎంతో ప్రత్యేకమైన అనుభూతి అని పేర్కొన్నారు. అయితే ప్రస్తుతం చోటుచేసుకున్న పరిణామాల కారణంగా కుమార్తె కోరికను నెరవేర్చలేకపోతున్నామని ఆవేదన వ్యక్తం చేశారు. ఈ వ్యవహారంలో తమ బిడ్డ గురించి బాధపడిన ప్రతి ఒక్కరికీ కృతజ్ఞతలు తెలిపారు.

మరోవైపు వివాహ వేదిక మార్పుపై కూడా షర్మిల కీలక ప్రకటన చేశారు. ఇది పెద్దలు కుదిర్చిన వివాహమని, ఎలాంటి వివాదాలు, గొడవలకు తావులేకుండా ప్రశాంత వాతావరణంలో పెళ్లి జరగడం ముఖ్యమని అభిప్రాయపడ్డారు. అందుకే వైఎస్‌ అంజలి రెడ్డి, సోముల రఘురామ్‌ రెడ్డిల వివాహ వేడుకను యలహంక ప్యాలెస్‌లో కాకుండా మరో ప్రదేశంలో నిర్వహించాలని నిర్ణయించినట్లు వెల్లడించారు.

బంధుమిత్రులు, ఆత్మీయుల సమక్షంలో వివాహ వేడుకను నిర్వహించనున్నట్లు పేర్కొన్న షర్మిల.. కాబోయే నవదంపతులకు ప్రజలందరి ఆశీస్సులు, దీవెనలు ఉండాలని ఆకాంక్షించారు. మొత్తానికి యలహంక ఆస్తి వివాదం కుటుంబ వ్యవహారాన్ని దాటి రాజకీయంగానూ చర్చనీయాంశంగా మారింది. ఆస్తిపై తన హక్కును స్పష్టం చేస్తూనే, కుమార్తె వివాహం ప్రశాంతంగా జరగాలనే ఉద్దేశంతో వేదికను మార్చుతున్నట్లు షర్మిల చేసిన ప్రకటన ఇప్పుడు రాజకీయ వర్గాల్లో ఆసక్తికర చర్చకు దారితీసింది.

#YSSharmila #YSJagan #YelahankaPalace #YelahankaProperty #SharmilaComments #JaganSharmila #YSFamily #AnjaliReddy #APPolitics #AndhraPradeshNews #TeluguNews #PoliticalNews #GEETV #GEETVNews