ఏపీ మున్సిపల్ ఎన్నికల ఫలితాలపై ఉత్కంఠ

GEETV , అమరావతి:ఆంధ్రప్రదేశ్ రాష్ట్రవ్యాప్తంగా మున్సిపల్ ఎన్నికల ఫలితాలపై ఉత్కంఠ నెలకొంది. రాష్ట్రంలోని పట్టణ స్థానిక సంస్థల్లో ఓట్ల లెక్కింపు ప్రక్రియ ఉదయం 8 గంటలకు ప్రారంభమైంది. మేయర్, ఛైర్‌పర్సన్ పీఠాలను దక్కించుకునేందుకు పోటీ చేసిన అభ్యర్థులతో పాటు, కౌన్సిలర్లు, కార్పొరేటర్లుగా గెలుపొందాలని ఆశిస్తున్న వేలాది మంది అభ్యర్థుల భవితవ్యం మరికొద్ది గంటల్లో తేలనుంది. దాదాపు 60 లక్షల మంది ఓటర్లు తమ ఓటు హక్కు ద్వారా ఇచ్చిన తీర్పు వెల్లడవుతుండటంతో రాజకీయ పార్టీల్లో తీవ్ర ఉత్కంఠ నెలకొంది.

రాష్ట్రవ్యాప్తంగా 92 పట్టణ స్థానిక సంస్థల పరిధిలో ఓట్ల లెక్కింపు కొనసాగుతోంది. మొత్తం 13 మేయర్ స్థానాలకు ఎన్నికలు జరగ్గా, కూటమి తరఫున తెలుగుదేశం పార్టీ 10 స్థానాల్లో, జనసేన రెండు స్థానాల్లో, భారతీయ జనతా పార్టీ ఒక స్థానంలో పోటీ చేశాయి. మరోవైపు వైఎస్సార్ కాంగ్రెస్ పార్టీ మొత్తం 13 మేయర్ స్థానాల్లోనూ అభ్యర్థులను బరిలో నిలిపింది. దీంతో ప్రధాన పార్టీల మధ్య పోరు ఆసక్తికరంగా మారింది.

ఇక 87 పురపాలక సంఘాలు, నగర పంచాయతీల ఛైర్‌పర్సన్ స్థానాలకు సంబంధించి 17 చోట్ల ఏకగ్రీవ ఎన్నికలు పూర్తయ్యాయి. మిగిలిన 70 స్థానాల్లో తెలుగుదేశం పార్టీ 49 చోట్ల, జనసేన 17 చోట్ల, బీజేపీ నాలుగు చోట్ల పోటీ చేస్తున్నాయి. వైఎస్సార్ కాంగ్రెస్ పార్టీ కూడా మొత్తం 70 స్థానాల్లో అభ్యర్థులను బరిలోకి దించింది. దీంతో పురపాలక పీఠాలపై ఏ పార్టీ ఆధిపత్యం సాధిస్తుందన్నది రాజకీయ వర్గాల్లో చర్చనీయాంశంగా మారింది.

ఈ ఎన్నికలను అధికార కూటమి ప్రభుత్వం ప్రతిష్ఠాత్మకంగా తీసుకుంది. తాము అమలు చేస్తున్న అభివృద్ధి, సంక్షేమ కార్యక్రమాలకు ప్రజలు మద్దతు తెలిపారని, ఆ ప్రభావం ఎన్నికల ఫలితాల్లో స్పష్టంగా కనిపిస్తుందని కూటమి నేతలు ధీమా వ్యక్తం చేస్తున్నారు. మరోవైపు ప్రభుత్వంపై ప్రజల్లో ఉన్న అసంతృప్తి తమకు అనుకూలంగా మారుతుందని, పలు ప్రాంతాల్లో గట్టి పోటీ ఇస్తామని వైఎస్సార్ కాంగ్రెస్ పార్టీ నాయకత్వం ఆశాభావం వ్యక్తం చేస్తోంది.

కౌంటింగ్ ప్రక్రియలో భాగంగా ముందుగా వార్డులు, డివిజన్ల వారీగా బ్యాలెట్ పత్రాలను వేరు చేసి కట్టలు కట్టనున్నారు. ఈ ప్రక్రియకు ఒక్కో కేంద్రంలో గంట నుంచి గంటన్నర వరకు సమయం పట్టే అవకాశం ఉంది. అనంతరం ఓట్ల లెక్కింపు చేపట్టి ఫలితాలను వెల్లడించనున్నారు. రాష్ట్రవ్యాప్తంగా ఏర్పాటు చేసిన 138 కౌంటింగ్ కేంద్రాల్లో మొత్తం 47,817 మంది అధికారులు, ఉద్యోగులు, సిబ్బంది ఈ ప్రక్రియలో పాల్గొంటున్నారు. ఎలాంటి అవాంఛనీయ సంఘటనలు చోటుచేసుకోకుండా కౌంటింగ్ కేంద్రాల వద్ద అవసరమైన ఏర్పాట్లు చేపట్టారు. ఫలితాల ప్రకటనకు సంబంధించి రాత్రి 8 గంటల్లోగా ప్రక్రియ పూర్తి చేయాలని అధికారులు లక్ష్యంగా పెట్టుకున్నారు.

#APMunicipalElections #ElectionResults #APPolitics #MunicipalElectionResults #TDP #YSRCP #JanaSena #BJP #AndhraPradesh #Guntur #ElectionCounting #APNews #TeluguNews #BreakingNews #GEETV #GEETVNews