అభివృద్ధే అజెండాగా ఎన్నికల బరిలోకి దిగాలి: మంత్రి కొల్లు రవీంద్ర
మచిలీపట్నం: స్థానిక ఎన్నికల్లో గెలుపే లక్ష్యంగా కూటమి నేతలు, కార్యకర్తలు సమష్టిగా పనిచేయాలని రాష్ట్ర గనులు, భూగర్భ వనరులు, ఎక్సైజ్ శాఖ మంత్రి కొల్లు రవీంద్ర పిలుపునిచ్చారు. అభివృద్ధినే ప్రధాన అజెండాగా చేసుకుని ప్రజల్లోకి వెళ్లాలని, నూరు శాతం ఫలితాలు సాధించే దిశగా కృషి చేయాలని సూచించారు. కృష్ణా జిల్లా మచిలీపట్నంలో నిర్వహించిన కూటమి కార్పొరేటర్ అభ్యర్థుల పరిచయ కార్యక్రమంలో ఆయన పాల్గొని మాట్లాడారు.
ఈ కార్యక్రమానికి మచిలీపట్నం ఎంపీ వల్లభనేని బాలశౌరి, ఆర్టీసీ చైర్మన్ కొనకళ్ల నారాయణరావు, డీసీఎంఎస్ చైర్మన్ బండి రామకృష్ణ, బీజేపీ నాయకుడు పంతం గజేంద్రతో పాటు పలువురు కూటమి నాయకులు హాజరయ్యారు. ఎన్నికల్లో అనుసరించాల్సిన వ్యూహాలు, ప్రచారాన్ని ప్రజల్లోకి విస్తృతంగా తీసుకెళ్లాల్సిన ఆవశ్యకతపై నాయకులు దిశానిర్దేశం చేశారు.
ఈ సందర్భంగా మంత్రి కొల్లు రవీంద్ర మాట్లాడుతూ.. కూటమి అభ్యర్థులు అభివృద్ధిని ప్రధాన అంశంగా తీసుకుని ప్రజల ముందుకు వెళ్లాలని సూచించారు. ప్రజలకు నిరంతరం అందుబాటులో ఉంటూ, వారి సమస్యల పరిష్కారానికి కృషి చేసే ప్రజాప్రతినిధులుగా గుర్తింపు పొందాలని ఆకాంక్షించారు. ప్రజలకు సేవలందించడం ద్వారా ప్రభుత్వానికి మంచి పేరు తీసుకురావాలని అభ్యర్థులకు సూచించారు.
ఎన్నికల ప్రచారంలో ఎక్కడా నిర్లక్ష్యానికి తావివ్వకూడదని మంత్రి స్పష్టం చేశారు. ప్రతి డివిజన్‌లో విస్తృతంగా ప్రచారం నిర్వహిస్తూ, ప్రజలను నేరుగా కలుసుకోవాలని సూచించారు. పార్టీ నాయకులు, కార్యకర్తల మధ్య సమన్వయం ఉండాలని, అభ్యర్థుల విజయానికి ప్రతి ఒక్కరూ బాధ్యతగా పనిచేయాలని పిలుపునిచ్చారు. కూటమి శ్రేణుల సమష్టి కృషితో ఆశించిన ఫలితాలు సాధించేందుకు ప్రణాళికాబద్ధంగా ముందుకు సాగాలని అన్నారు.
#KolluRavindra #Machilipatnam #TDP #APPolitics #KrishnaDistrict #CorporatorElections #AllianceCandidates #AndhraPradesh #TeluguNews #PoliticalNews #BreakingNews #GEETV
