69వ వార్డులో కూటమి అభ్యర్థి ముప్పవరపు భారతి విస్తృత ప్రచారం

రిపోర్టర్ – వంశీకృష్ణ పాలడుగు

గుంటూరు: గుంటూరు తూర్పు నియోజకవర్గంలోని 69వ వార్డులో కూటమి బలపరిచిన కార్పొరేటర్ అభ్యర్థి ముప్పవరపు భారతి సోమవారం ఎన్నికల ప్రచారం నిర్వహించారు. వార్డులోని స్థానిక కాలనీల్లో ఇంటింటికీ తిరుగుతూ ఓటర్లను కలిశారు. తన హయాంలో చేపట్టిన అభివృద్ధి పనులను పరిశీలించి మరోసారి తనకు అవకాశం కల్పించాలని ప్రజలను కోరారు.

ఈ సందర్భంగా ముప్పవరపు భారతి మాట్లాడుతూ.. వార్డులో తాను చేపట్టిన అభివృద్ధి కార్యక్రమాలను పరిగణనలోకి తీసుకుని తనకు ఓటు వేయాలని విజ్ఞప్తి చేశారు. ప్రజల సమస్యల పరిష్కారానికి, వార్డు అభివృద్ధికి కృషి చేస్తానని తెలిపారు.

నవంబర్ 1వ తేదీన జరిగే ఎన్నికల్లో గుంటూరు నగర కూటమి మేయర్ అభ్యర్థి కోవెలమూడి లక్ష్మీ అపర్ణతో పాటు తనకు కూడా మద్దతు ఇవ్వాలని కోరారు. కార్పొరేటర్ అభ్యర్థిగా తనకు సైకిల్ గుర్తుపై ఓటు వేసి అఖండ మెజారిటీతో గెలిపించాలని ఓటర్లను అభ్యర్థించారు.

ప్రచారంలో భాగంగా స్థానికులను కలుసుకుంటూ కూటమి అభ్యర్థుల విజయానికి సహకరించాలని ఆమె కోరారు.

#MuppavarapuBharathi #GunturNews #GunturElections #69thWard #GEETV

గుంటూరు, తెనాలిలో అక్టోబర్ 30 మద్యం దుకాణాలు బంద్‌! జిల్లా కలెక్టర్‌, సి.యం. సాయికాంత్‌ వర్మ

గుంటూరు, అక్టోబర్ 26: స్థానిక సంస్థల ఎన్నికల నేపథ్యంలో గుంటూరు నగరపాలక సంస్థ, తెనాలి పురపాలక సంఘం పరిధిలో మద్యం విక్రయాలను నిలిపివేయనున్నట్లు జిల్లా కలెక్టర్‌, జిల్లా ఎన్నికల అధికారి సి.యం. సాయికాంత్‌ వర్మ తెలిపారు. ఈ మేరకు సోమవారం ప్రకటన విడుదల చేశారు.

గుంటూరు నగరపాలక సంస్థ, తెనాలి పురపాలక సంఘం పరిధిలో నవంబర్‌ 1న పోలింగ్‌ జరగనున్న నేపథ్యంలో, ఈ నెల 30వ తేదీ సాయంత్రం 5 గంటల నుంచి మద్యం దుకాణాల్లో విక్రయాలు నిలిపివేయనున్నట్లు వెల్లడించారు. సంబంధిత నగరపాలక, పురపాలక చట్టాల్లోని నిబంధనల ప్రకారం ఈ నిర్ణయం తీసుకున్నట్లు పేర్కొన్నారు.

అలాగే నవంబర్‌ 3న ఓట్ల లెక్కింపు జరగనున్నందున, కౌంటింగ్‌కు 48 గంటల ముందు నుంచి కూడా మద్యం విక్రయాలపై నిషేధం అమల్లో ఉంటుందని తెలిపారు. ఎన్నికల సమయంలో శాంతిభద్రతలను కాపాడటం, ఎన్నికల ప్రక్రియ సజావుగా నిర్వహించడం లక్ష్యంగా ఈ చర్యలు చేపడుతున్నట్లు వివరించారు.

నిషేధ నిబంధనలను ఉల్లంఘించి మద్యం విక్రయాలు జరిపితే, సంబంధిత ఎన్నికల నిబంధనలు, చట్టాల ప్రకారం చర్యలు తీసుకుంటామని కలెక్టర్‌ హెచ్చరించారు.

#GunturNews #Tenali #LiquorBan #LocalBodyElections #APNews #GEETV

గెలుపు మనదే.. మెజారిటీ చరిత్రాత్మకం కావాలి!మేయర్ అభ్యర్థి కోవెలమూడి లక్ష్మీ అపర్ణ పిలుపు..

రిపోర్టర్ – వంశీకృష్ణ పాలడుగు

గుంటూరు: నగర అభివృద్ధిని కొనసాగించేందుకు కూటమి అభ్యర్థులకు ప్రజలు మద్దతు తెలపాలని గుంటూరు నగర కూటమి మేయర్ అభ్యర్థి కోవెలమూడి లక్ష్మీ అపర్ణ కోరారు. ఎన్నికల ప్రచారంలో భాగంగా కేంద్ర సహాయ మంత్రి పెమ్మసాని చంద్రశేఖర్, ఎమ్మెల్యే నసీర్ అహ్మద్‌లతో కలిసి ఆమె ప్రచార కార్యక్రమంలో పాల్గొన్నారు. ఈ సందర్భంగా కూటమి బలపరిచిన 76 మంది కార్పొరేటర్ అభ్యర్థులకు ప్రజలు తమ అమూల్యమైన ఓటు వేసి భారీ మెజారిటీతో గెలిపించాలని విజ్ఞప్తి చేశారు.

కార్యకర్తలను ఉద్దేశించి లక్ష్మీ అపర్ణ మాట్లాడుతూ.. కూటమి నాయకులు, కార్యకర్తలు ఐక్యంగా పనిచేసి అభ్యర్థుల విజయానికి కృషి చేయాలని పిలుపునిచ్చారు. అన్ని డివిజన్లలో కూటమి అభ్యర్థులను అత్యధిక మెజారిటీతో గెలిపించి, ఆ విజయాన్ని ముఖ్యమంత్రి నారా చంద్రబాబు నాయుడుకు బహుమతిగా అందించాలని కోరారు. చారిత్రాత్మక మెజారిటీ సాధించడమే ముఖ్యమంత్రికి అందించే అసలైన బహుమతి అని ఆమె పేర్కొన్నారు.

అభివృద్ధి కొనసాగాలంటే కూటమికి మద్దతివ్వండి: పెమ్మసాని

కేంద్ర సహాయ మంత్రి పెమ్మసాని చంద్రశేఖర్ మాట్లాడుతూ.. 2024 ఎన్నికల్లో ప్రజలు ఇచ్చిన తీర్పుతో రాష్ట్రంలో అభివృద్ధి కార్యక్రమాలకు బాటలు పడ్డాయని అన్నారు. ప్రస్తుతం రాష్ట్రవ్యాప్తంగా వేల కోట్ల రూపాయలతో పలు అభివృద్ధి పనులు కొనసాగుతున్నాయని పేర్కొన్నారు.

గుంటూరు నగరంలోనూ అభివృద్ధి కార్యక్రమాలు నిరంతరాయంగా కొనసాగాలంటే మేయర్ అభ్యర్థి కోవెలమూడి లక్ష్మీ అపర్ణతో పాటు కూటమి బలపరిచిన 76 మంది కార్పొరేటర్ అభ్యర్థులకు ప్రజలు మద్దతు ఇవ్వాలని కోరారు. రాష్ట్రంలో చేపడుతున్న అభివృద్ధి కార్యక్రమాలకు కొనసాగింపుగా కూటమి అభ్యర్థులను గెలిపించాలని విజ్ఞప్తి చేశారు.

ఈ ప్రచార కార్యక్రమంలో గుంటూరు తూర్పు ఎమ్మెల్యే నసీర్ అహ్మద్, వేమూరు ఎమ్మెల్యే నక్కా ఆనందబాబు, కేంద్ర సహాయ మంత్రి పెమ్మసాని చంద్రశేఖర్‌తో పాటు గుంటూరు తూర్పు నియోజకవర్గంలోని 68, 69, 70, 71, 72వ డివిజన్ల కూటమి కార్పొరేటర్ అభ్యర్థులు, నాయకులు, కార్యకర్తలు పాల్గొన్నారు.

#LakshmiAparna #PemmasaniChandrasekhar #GunturElections #GunturNews #NDAAlliance #GEETV

గుంటూరు అభివృద్ధికి మార్వాడి, జైన్‌ సంఘాల సహకారం కీలకం: కేంద్ర మంత్రి పెమ్మసాని

డా. పచ్చవ గౌతమి
జీటీవి సీఈఓ

గుంటూరు: నగర అభివృద్ధిలో వ్యాపార వర్గాల భాగస్వామ్యం కీలకమని కేంద్ర గ్రామీణాభివృద్ధి, కమ్యూనికేషన్స్‌ శాఖ సహాయ మంత్రి డాక్టర్‌ పెమ్మసాని చంద్రశేఖర్‌ అన్నారు. చిన్న, మధ్య తరహా పరిశ్రమలు, వ్యాపారాలు అభివృద్ధి చెందినప్పుడే ఆయా ప్రాంతాల్లో ఉపాధి అవకాశాలు పెరుగుతాయని, ఆర్థిక పురోగతి సాధ్యమవుతుందని పేర్కొన్నారు. గుంటూరు నగరానికి చెందిన మార్వాడి సంఘం ఆధ్వర్యంలో ఆదివారం స్థానిక కన్వెన్షన్‌ హాల్లో నిర్వహించిన ఆత్మీయ సమావేశంలో ఆయన పాల్గొన్నారు. కూటమి ప్రభుత్వం బలపరిచిన మేయర్‌ అభ్యర్థి కోవెలమూడి లక్ష్మీ అపర్ణతో కలిసి సమావేశానికి హాజరయ్యారు. మార్వాడి, జైన్‌ సోదరులు తమ సంప్రదాయాలను కాపాడుకుంటూ, ఉమ్మడి కుటుంబ వ్యవస్థ స్ఫూర్తిని సమాజానికి అందించడం అభినందనీయమని పెమ్మసాని అన్నారు. వ్యాపార రంగంలోనే కాకుండా సామాజిక సేవలోనూ ఈ వర్గాలు అందిస్తున్న సేవలు ప్రశంసనీయమని పేర్కొన్నారు.

ప్రధాని నరేంద్ర మోదీ నాయకత్వంలో దేశం పారిశ్రామికంగా, సాంకేతికంగా అభివృద్ధి చెందుతోందని పెమ్మసాని తెలిపారు. మొబైల్‌ తయారీ రంగం విస్తరణ, విద్యుత్‌ ఉత్పత్తి సామర్థ్యం పెరుగుదలతో పాటు విమానాశ్రయాలు, జాతీయ రహదారులు, ఇతర మౌలిక సదుపాయాల అభివృద్ధికి కేంద్ర ప్రభుత్వం ప్రాధాన్యమిస్తోందని అన్నారు. ఆదాయపు పన్ను విషయంలో కేంద్ర ప్రభుత్వం కల్పించిన రాయితీలను కూడా ఆయన ప్రస్తావించారు. కేంద్రంలో బీజేపీ ప్రభుత్వం చేపడుతున్న కార్యక్రమాలకు తెలుగుదేశం, జనసేన పార్టీలు మద్దతుగా నిలుస్తున్నాయని తెలిపారు. రాష్ట్రంలో కూటమి ప్రభుత్వం కొనసాగిస్తున్న అభివృద్ధి, సంక్షేమ కార్యక్రమాలకు ప్రజల సహకారం అవసరమని పేర్కొన్నారు.

గుంటూరు నగర అభివృద్ధి పనుల గురించి ప్రస్తావిస్తూ.. సుమారు రూ.600 కోట్లతో ఏడు రైల్వే ఓవర్‌ బ్రిడ్జిలు (ఆర్‌ఓబీలు), రూ.571 కోట్లతో అమృత్‌ భారత్‌ 2.0 పథకం ద్వారా తాగునీటి సదుపాయాలు, రూ.400 కోట్లతో రహదారులు, డ్రైనేజీ నిర్మాణ పనులు చేపడుతున్నట్లు పెమ్మసాని వివరించారు. శంకర్‌ విలాస్‌ వంతెన నిర్మాణం విషయంలోనూ వెనుకడుగు వేయబోమని ఆయన అన్నారు. నిర్మాణ పనులను పూర్తి చేయడానికి అవసరమైన బాధ్యత తీసుకుంటానని, అవసరమైతే తన సొంత నిధులతోనైనా నష్టపరిహారం అందించి పనులు పూర్తయ్యేలా కృషి చేస్తానని తెలిపారు. వివాదాలకు దూరంగా ఉంటూ అభివృద్ధి, సంక్షేమాన్ని కోరుకునే మార్వాడి, జైన్‌ సంఘాల మనోభావాలను గౌరవిస్తామని చెప్పారు.

నగర అభివృద్ధికి సహకరించండి: లక్ష్మీ అపర్ణ

గుంటూరు నగర అభివృద్ధిలో మార్వాడి సంఘ సభ్యుల భాగస్వామ్యం ఎంతో ముఖ్యమని మేయర్‌ అభ్యర్థి కోవెలమూడి లక్ష్మీ అపర్ణ అన్నారు. మార్వాడి సంఘం ఆధ్వర్యంలో నిర్వహిస్తున్న గోసేవ, ఇతర సామాజిక సేవా కార్యక్రమాలను ఆమె అభినందించారు.నగరానికి అవసరమైన మౌలిక సదుపాయాల అభివృద్ధికి ప్రాధాన్యమిస్తానని హామీ ఇచ్చారు. ప్రజల అవసరాలను గుర్తించి అభివృద్ధి పనులు చేపట్టేందుకు కృషి చేస్తానని పేర్కొంటూ, ఎన్నికల్లో తమకు భారీ మెజారిటీతో మద్దతు ఇవ్వాలని సంఘ సభ్యులను కోరారు. ఈ కార్యక్రమంలో మాజీ మేయర్‌ కోవెలమూడి (రవీంద్ర) నాని, ఉమ్మడి గుంటూరు జిల్లా జనసేన పార్టీ అధ్యక్షుడు గాదె వెంకటేశ్వరరావు, గుంటూరు జిల్లా బీజేపీ అధ్యక్షుడు తిరుపతిరావు, టీడీపీ నాయకుడు ఉగ్గిరాల సీతారామయ్య, మాజీ కార్పొరేటర్‌ ఈరంటి వరప్రసాద్‌ (బాబు), జుగ్‌ రాజ్‌ జైన్‌ భండారి, వినోద్‌ జైన్‌, రాజేంద్ర జైన్‌ తదితరులు పాల్గొన్నారు.

#GunturNews #PemmasaniChandrasekhar #LakshmiAparna #GunturDevelopment #ShankarVilasBridge #MarwariAssociation #GEETV

లాడ్జి సెంటర్‌ చర్చిలో లక్ష్మీ అపర్ణ విజయం కోసం ప్రత్యేక ప్రార్థనలు

రిపోర్టర్ – వంశీకృష్ణ పాలడుగు

గుంటూరు: లాడ్జి సెంటర్‌లోని నార్త్ పారిష్ లూథరన్ చర్చిలో కూటమి మేయర్ అభ్యర్థి కోవెలమూడి లక్ష్మీ అపర్ణ ప్రత్యేక ప్రార్థనలు నిర్వహించారు. ఎన్నికల్లో ఆమె విజయం సాధించాలని చర్చి సంఘ సభ్యులు ప్రార్థనలు చేశారు.

ఈ సందర్భంగా చర్చి ఫాదర్‌ మాట్లాడుతూ.. గతంలో కోవెలమూడి నాని మేయర్‌గా ఉన్న సమయంలో చర్చి నిర్మాణానికి సంబంధించి కొన్ని సమస్యలు ఎదురయ్యాయని తెలిపారు. ఆ సమస్యను నాని దృష్టికి తీసుకెళ్లగా, ఆయన కులమతాలకు అతీతంగా స్పందించి సహకారం అందించారని గుర్తుచేశారు. మున్సిపల్ కార్పొరేషన్ నుంచి అనుమతులు పొందడంలో కొంత జాప్యం జరిగినప్పటికీ, నాని చొరవ తీసుకుని సమస్య పరిష్కారానికి సహాయం చేశారని పేర్కొన్నారు.

గతంలో తమకు అందించిన సహకారాన్ని గుర్తుచేసుకుంటూ, కోవెలమూడి లక్ష్మీ అపర్ణ ఎన్నికల్లో విజయం సాధించాలని చర్చి సంఘ సభ్యులు ప్రత్యేక ప్రార్థనలు నిర్వహించారు. ఈ సందర్భంగా ఆమెకు శుభాకాంక్షలు తెలిపారు.

ఈ కార్యక్రమంలో బిషప్ డాక్టర్ ఎస్.జె. బాబురావు, పురుషోత్తం చౌదరి, శామ్యూల్ జాన్, పాస్టర్ కిరణ్, రెవరెండ్ ఆర్. మధుబాబు తదితరులు పాల్గొన్నారు.

#LakshmiAparna #GunturMayorElection #GunturNews #SpecialPrayers #GEETV