ఎన్టీఆర్, కృష్ణా జిల్లాల్లో పోలింగ్ కేంద్రాలను పరిశీలించిన రాష్ట్ర ఎన్నికల కమిషనర్ అనిల్ చంద్ర పునేఠ

Parasuram Pachava | Bureau Chief | GEETV

GEETV, విజయవాడ: ఆంధ్రప్రదేశ్ రాష్ట్రవ్యాప్తంగా జరుగుతున్న ఎంపీటీసీ, జెడ్పీటీసీ ఎన్నికల పోలింగ్ ప్రశాంత వాతావరణంలో కొనసాగుతోందని రాష్ట్ర ఎన్నికల కమిషనర్ అనిల్ చంద్ర పునేఠ తెలిపారు. ఎన్నికల నిర్వహణ తీరును క్షేత్రస్థాయిలో పరిశీలించేందుకు గురువారం ఎన్టీఆర్, కృష్ణా జిల్లాల్లోని పలు పోలింగ్ కేంద్రాలను ఆయన సందర్శించారు.

ఇబ్రహీంపట్నం మండలం గుంటుపల్లిలోని రైల్వే వాగన్ వర్క్‌షాప్‌లో ఏర్పాటు చేసిన పోలింగ్ కేంద్రం, విజయవాడ రూరల్ మండలం పాతపాడులోని పోలింగ్ కేంద్రం, గన్నవరం జిల్లా పరిషత్ బాలుర ఉన్నత పాఠశాలలో ఏర్పాటు చేసిన పోలింగ్ కేంద్రాలను ఆయన పరిశీలించారు. ఆయా కేంద్రాల్లో పోలింగ్ నిర్వహణ తీరు, ఓటర్లకు కల్పించిన సౌకర్యాలు, భద్రతా ఏర్పాట్లపై పోలింగ్ సిబ్బందిని అడిగి వివరాలు తెలుసుకున్నారు.

పోలింగ్ కేంద్రాలకు వచ్చిన ఓటర్లతోనూ కమిషనర్ మాట్లాడారు. ఓటు వేసే సమయంలో ఏవైనా ఇబ్బందులు ఎదురవుతున్నాయా? అవసరమైన మౌలిక సదుపాయాలు అందుబాటులో ఉన్నాయా? అని ఆరా తీశారు. అన్ని ఏర్పాట్లు సంతృప్తికరంగా ఉన్నాయని, ఎలాంటి ఇబ్బందులు లేవని ఓటర్లు, పోలింగ్ సిబ్బంది తెలిపినట్లు ఆయన వెల్లడించారు. పోలింగ్ కేంద్రాల్లో చేసిన ఏర్పాట్లపై సంతృప్తి వ్యక్తం చేశారు.

రాష్ట్రవ్యాప్తంగా ఓటర్లు ప్రశాంత వాతావరణంలో తమ ఓటు హక్కును వినియోగించుకుంటున్నారని అనిల్ చంద్ర పునేఠ తెలిపారు. జిల్లా యంత్రాంగాలు పోలింగ్ నిర్వహణకు అవసరమైన అన్ని ఏర్పాట్లను సమర్థవంతంగా చేపట్టాయని, రాజకీయ పార్టీలు కూడా తమ బాధ్యతలను చక్కగా నిర్వహిస్తున్నాయని పేర్కొన్నారు.

సాయంత్రం 5 గంటలలోపు పోలింగ్ ప్రక్రియ పూర్తవుతుందని ఆశిస్తున్నామని తెలిపారు. పోలింగ్ ముగిసిన అనంతరం బ్యాలెట్ బాక్సులను పటిష్టమైన భద్రత మధ్య స్ట్రాంగ్ రూమ్‌లకు తరలిస్తామని వివరించారు. రిసెప్షన్ కేంద్రాల్లో అవసరమైన లాంఛనాలు పూర్తి చేసిన తర్వాత బ్యాలెట్ బాక్సులను భద్రపరుస్తామని చెప్పారు. సందర్శించిన అన్ని పోలింగ్ కేంద్రాల్లో సీసీటీవీ నిఘా ఏర్పాటు చేసినట్లు రాష్ట్ర ఎన్నికల కమిషనర్ వెల్లడించారు. స్ట్రాంగ్ రూమ్‌లలోనూ నిరంతర సీసీటీవీ పర్యవేక్షణ ఉండేలా చర్యలు తీసుకుంటున్నామని తెలిపారు. ఎన్నికల ప్రక్రియను పారదర్శకంగా, ప్రశాంతంగా పూర్తి చేసేందుకు అవసరమైన అన్ని జాగ్రత్తలు తీసుకుంటున్నట్లు స్పష్టం చేశారు.

#APElections #MPTCElections #ZPTCElections #AnilChandraPunetha #ElectionCommission #PeacefulPolling #NTRDistrict #KrishnaDistrict #Vijayawada #Gannavaram #CCTVSurveillance #StrongRoom #AndhraPradeshNews #GEETVNews